Амьд явахад 3 жил?

Танд амьд явахад 3 жил үлдсэн гэж хэн нэгэн хэлбэл та итгэх болов уу? Мэдээж хэн, ямар нөхцөлд, яаж хэлснээс итгэх үгүй нь шалтгаална л даа. Гэхдээ дэлхий дахинаар яригдаж буй, олон кино, зохиол болоод байгаа тэр гайт зүйлс 2012 он болох үгүйд та итгэж байна уу?

Итгэсэн ч үгүй ч 2012 оны 12 сарын 21 хүртэл яг 3 жил үлдлээ. Итгэж үлдсэн хэдэн жилээ сайн сайхан өнгөрүүлэхэд анхаарах ёстой юу, эсвэл худлаа даа гэж түүнээс цаашихыг харан бүх зүйлээ зохицуулан амьдрах уу? Зарим хүмүүс юу гэж дэлхий сөнөх юм болох вэ дээ гэх юм. Зарим нь томоохон хэмжээний сүйрэл болохгүй ч гэлээ тодорхой хэмжээний өөрчлөлтүүд гарна гэх юм. Миний бодлоор бол шууд сүйрчихгүй ч гэлээ, өөрчлөлтүүд гарна. Харин хир их гэдэг нууц хэвээр.

Монголчууд бие биенээсээ сонссон үнэн худал нь мэдэгдэхгүй зүйлээр шуугих их дуртай. Саяхан зун шүү дээ, УБ-т томоохон хэмжээний газар хөдөлнө гэж байсан нь худлаа болж таарсан. Зөвхөн Монголчууд л хүн төрөлхтний төгсгөл ирж байна гэж цуурч байвал итгэхгүй өнгөрөхөд буруудаад байх юмгүй. Гэтэл хаа сайгүй л 2012 гэдэг тоогоор цуурч байдаг. Миний мэдэхийн энэ тухай дөрвөн томоохон хэмжээний кино хийгдсэн. “Doomsday: 2012,” “Nostradamus 2012,” (баримтат) “Day After Tomorrow,” хамгийн сүүлд “2012” кино дэлгэцнээ гарч сүүлийн үеийн компьютер графикаар олныг алмайруулсан кино болжээ. Мэдээж Голливуд энэ хүмүүсийн хийрхлээр хөөрхөн мөнгө олчхоо мэдсэн болоод энэхүү олон киног хийсэн, түүнийг нь хүмүүс нүдээ бүлтийлгэн үзсээр байгаа. Гэхдээ л... Хэрвээ үнэн бол яах уу гэдэг бодол тархины тэртээ хойно байгаад л, чимээгүй аваарын гэрэл ассан юм шиг анивчаад байгаа л юм даа.