Оройтсон бороо ба мөнгөний урсгал

За ингээд намар болжээ гэж. Удахгүй сургууль цэцэрлэг цуглана, хүмүүсийн ээлжийн амралтууд ерөнхийдөө дуусаж хот маань буцаад бужигнан даа. Сайхан шүү, шороо тоос шуурсан, өвөлдөө утаан бүрхүүлтэй, чанаргүй хүнсний бүтээгдэхүүн худалдсан, соёлгүй бүдүүлэг хөдөөнийхөн, бие үнэлэгч, завхай залуусаар дүүрсэн ч гэлээ миний Улаанбаатар сайхаааан. За мэдээж тэгээд машин барьдаг мань мэт зам нь там болсон ч гэлээ нааш цааш хөлхсөн хэвээр л байдаг нь "Сэгсгэр ч гэсэн ээж минь, сиймхий ч гэсэн гэр минь" гэгчээр өөриймсөг хандаж орхин явж чадахгүй, боломжгүйдээ энэхүү метрополис хотдоо амьдран суух юм даа.

Тэгж байтал нь 8-аас 9 сарыг дуустал төвийн хэдэн замаа засна гэж Яам нь айлдаж байх юмаа. Ухаан мулгуу миний бодоход борооны, хүйтний улирал эхэлж, хүн ам нь буцан төвлөрч эхлэх үед зам харгуйгаа засаж янзалж байдаг манайхаас өөр тэнэг газар байдаггүй л байлтай. Сая хавар энд тэнд баахан зам хаагаад засаад л байх шиг байсан, тэгсэн нөгөөх нь энэ зуны хэдхэн хүчтэй бороонд шороо нь урсаад явчихсан байх юм. Дахиад л баахан нүхтэй зам.
Нэг сурвалжлагчийн бичсэнчлэн, Монголын урлагтай жолооч нар мандтугай! УБ ралли гэж нэрлэе гэж хүртэл санал гарсан. Үнэн юм чинь. Өдөр бүр бартаат замын уралдаанд явж байгаагаас дутахааргүй л уран жолоодлого үзүүлж байна шүү дээ. Зам муу, нүх сүвийг нь тойрно, дээрээс нь жолооч нар нь бас муу, соёлгүй, за тэгээд тэд нараас зугтана, дайжна, бултана, хажуугаар нь нүхээ тойрно, аа бас тэгээд очих газраа хурдан оччих санаатай хурдална. Энэ чинь ямар ч хүнд бартаат замын уралдаанаас дутахааргүй шүү дээ.

За тэр урлаг мурлаг ч яахав, угаасаа Монголчууд их авьяаслаг ард түмэн, цусанд нь байгаа биз. Харин энэ зам засварыг хэн, яах гэж ийм хүнд хямралтай жил, цаг хугацаа, цаг агаарын оновчгүй үед хийлгэдэг байна аа гэж бодлоо. Тэгсэн бодоод байхан ээ "тэр чинь их учир жанцантай, Жанцан гэдэг чинь манай өвөө байгаа юм" гэдэг шиг л. Цаана нь нөгөө төрийн хэдэн нөхдүүд урьд жилүүдэд зүгээр идэж болдог байсан мөнгөн урсгал нь тасалдаад ирүүт гэнэт мэргэн санаа олоод, угаасаа муу замтай юм чинь засЪя гэхээр үгүй гэж дургүйцэх хүнгүй хэмээн сэтгэж энэхүү төсөл гэх юмыг сэтгэж гэдэг нь илт болоод ирж байгаа юмаа. Мэдээж хэн ч надад "харин тийм ээ, сорри найзаа, гэхдээ бид нар идэх мөнгө олдохгүй тэгээд ийм юм бодож олоод" гэж хэлэхгүй л дээ. Гэхдээ мань мэтийн зовж байж олсон хэдэн төгрөгөөс минь төлсөн татварыг ингэж зарлагдаж, хэн нэгэн тэнд зүгээр л суугаад баяжиж байгааг харахлаар зүрхэнд цус хурах юмаа (лаг сүртэй байна уу ха ха).

Ханаж цаддаггүй төрийн түшмэдүүдээ, өнөөдөр биш юм аа гэхэд маргааш, энэ амьдралдаа биз юмаа гэхэд үр хүүхдүүдэд чинь энэ их идэж уух, авилгал чинь сайн тусахгүй л байлтай. Айж ичихээ байсан ч гэлээ, миний эсвэл бусдын биш ядаж өөрийнхөө хойч ирээдүйгээ бодоод наад ногоорсон бөндгөрөө жоохон ажиллуулаад үзээч. Идэж болох л байх, авилгал хээл хахууль хаа ч байдаг асуудал, гэхдээ хэмжээ хязгаар гэж юм байдаг даа.

Төрийн төлөө боож үхэж байгаа нэг бүдүүн оготно бичив (ха ха ха).